Il Museu dal Domo di Udin al da acet al esemplâr plui famôs e antîc de Bandiere dal Friûl, la setime plui antighe de Europe (secul XIV) e ancjemò vuê il simbul plui cognossût dal Friûl.
Al è un drap maraveôs di forme cuadrangolâr, di sede colôr grise celeste.
Tal mieç e je une acuile cul cjâf che al cjale a man çampe. Il cuarp, lis çatis e lis alis a son di colôr zâl, e lis sgrifis rossis.
La divignince de bandiere dal Friûl e rimonte ae ete dal Stât patriarcjâl di Aquilee, clamât ancje Stât patriarcjâl furlan, che dal 1077 al 1420 al à guviernât, inte suaze dal Sacri Roman Imperi, la Patrie dal Friûl.
La bandiere e jere part dal furniment funerari dal patriarcje Beltram di Saint Geniès, che al è stât su la catidre di Aquilee dal 1334 al 1350 e che al è stât copât in maniere barbare di une conzure di nobii furlans. Intal museu al è conservât ancje un altri drap, che al è stât doprât par creâ un pâr di cjalçârs pontificâi e che cul restaur dal 1999 al è stât ripuartât a bandiere.
Stant che e je corispondence tes dimensions cun chel cusît su la tuniche dal beât Beltram, si pense che insiemi a podessin costituî une sole bandiere a dôs musis.
Il simbul de acuile, lu confermin i reperts numismatics, al caraterizave il Stât patriarcjâl furlan za tal timp di Volchîr di Erla, Patriarcje di Aquilee dal 1204 al 1218.
Ae bandiere antighe, conservade culì, si ispire chê moderne dal Friûl, definide e ricognossude cu la leç regjonâl 27/2001.
Cheste e ven esponude in maniere uficiâl intai lûcs publics dai comuns di lenghe furlane, dongje de bandiere de Regjon Autonome Friûl-Vignesie Julie, di chê taliane e di chê de UE.