Il Museu dal Domo di Udin al è dedicât al Patriarcje beât Beltram di Saint Geniès (cirche 1280 – 1350), che al à guviernât il Stât patriarcjâl furlan tra il 1334 e il 1350, cuant che al è stât sassinât di une conzure di nobii furlans. Al veve savût implantâ sul teritori une politiche di rinovament civîl e morâl, cun riformis istituzionâls laichis e eclesiâls, aministrativis e militârs.

Al veve inviât un procès di promozion dal valôr storic, culturâl e identitari, istituint par esempli une Universitât a Cividât.

Il museu al rapresente une memorie significative dal so patriarcjât e al mostre la sô grandece.

Intai edificis che a fasin part dal museu, a son une vore impuartants doi ciclis di afrescs realizâts tra il 1348 e il 1349 di Vitale da Bologna, artist clamât a Udin dal patriarcje Beltram, che cussì al à inviât une epoche di rinovament de piture furlane. Intes salis a son ancje altris afrescs di epochis diferentis, cun temis e figuris liturgjichis.

Intal Batisteri, istituît par volontât dal beât Beltram intal 1348, e je conservade une preziose opare di sculture, o ben la arcje di marmul dal patriarcje, che lui stes al veve comissionade intal 1350 pe Basiliche di Aquilee par dâ acet aes relicuiis dai Sants Ermacore e Fortunât. Intal 1353, la arcje e je stade destinade a contignî il cuarp dal beât Beltram.

Il museu al conserve il so furniment funebri cun esemplârs tessii rârs dai secui XIII e XIV e un repertori di manufats di oresinarie sacre e profane che a rimontin ae ete tra i secui XIV e XVII, risultât de devozion pal patriarcje.

Tra chei manufats, e je interessante la spile relicuie di Sante Elisabete di Ongjarie, regalade dal imperadôr Carli IV di Lussemburc tal 1368.

Intes salis disore, che si puedin visitâ su richieste, a son esponûts manufats e oparis che a documentin la evoluzion dal Domo des origjins fin al secul XVIII.