Altris testemoneancis dal Domo antîc e des sôs trasformazions fin in dì di vuê a son documentadis intes Salis disore che si puedin visitâ cuntune vuide.

In chescj ambients a son esponûts paraments sacris, aurs, sculturis, afrescs e pituris su len dal secul XIII al XVIII. Di chestis salis e fâs part la capele antighe de Santissime Trinitât (secul XIV) che dal marzo 2025 al è pussibil visitâle amirant i afrescs atribuîts ae scuele di Vitâl di Bologne cu la Anunziazion (Foto 1) intal mûr a Est e un toc di Crucifission intal mûr insom (Foto 2). Cun di plui e je ilustrade la storie dai orghins monumentâi dal Sietcent, fats dal dalmate Pietro Nachini (par cravuat Petar Nakić): chi al è ancje il sôl ritrat di Nachini che al sedi restât. Al è il costrutôr di orghins plui innomenât de scuele veneziane dal Sietcent, nassût in Dalmazie intal 1694. Tra Istrie e Dalmazie si cjatin ancjemò orghins che al veve fat lui. L’operât di Nachini in Friûl al à metût lis fondis par une vere tradizion dai orghins che ancjemò in dì di vuê e sorevîf traviers dal lavôr di fabrichis di orghins preseadis.

Il percors si siere inte sale dai Arcolonians (sale 10) dedicade ai Sants Zuan Batiste e Eustachi (1368), seconde capele a man drete dal cjâf de crôs de plante dal Domo antîc. Il mûr a Sud al è frescjât cu lis storiis di Sant Eustachi e si pues amirâ une viodude de citât di Udin tor dal 1460-‘80.