L’arcje dal beât Bertrant

Une opare une vore impuartante e je la arcje di marmul comissionade dal Patriarcje Bertrant di Saint Geniès intal 1348 pe Basiliche di Aquilee cun chê di tignî lis relicuiis dai Sants Macôr e Fortunât, protomartars aquileiês (Foto 1). Il sarcofac al è stât traspuartât intal Domo di Udin intal 1353, e al è stât doprât par tignî il cuarp dal Patriarcje Bertrant muart intal 1350. Al è tignût sù di cinc statuis. Si pense che a rafigurin lis Santis Vergjinis Martaris aquileiês Erasme, Tecle, Dorotee e Eufemie, e Valentinian.
Inte casse a son i basrilêfs cu la iconografie di Macôr e Fortunât, ispirade al cicli romanic di afrescs che a son inte cripte de Basiliche di Aquilee, cu la sucession cronologjiche de “Passio” dai Sants Macôr e Fortunât riferide al Codiç 4 conservât inte Biblioteche Vuarneriane di Sant Denêl.

L’implant iconografic forsit al è stât sugjerît dal Patriarcje Bertrant. La leture e va daûr dal ordin dal percors fat dai devots ator de arcje in ocasion des preieris al cuarp dal Patriarcje.

(Foto 2, 3) Dal centri dal lâts lunc frontâl: cu la invistidure di vescul di Macôr de bande di Sant Pieri su consei di Sant Marc: a çampe Macôr sentât inte cjadree di vescul al predicje ai Aquileiês cun Fortunât che al ten sù il pastorâl. Dut a drete, la deposizion dai cuarps dai Sants Macôr e Fortunât (sene finâl).

(Foto 4) La narazion e va indenant bande il centri dal lâts lunc: il judiç Sebast al condane ae flagjelazion Macôr, che al jere stât denunziât dai sacerdots pagans; a man drete, Macôr al è leât ae crôs e al implore il Signôr, e al resist ae torture dismovint amirazion e solidarietât dal popul ator. A man çampe, Sant Macôr al esorcize il fi di Gregori in preson, li che al tornarà dopo vê batiât la famee di Gregori tacant dal fi plui zovin. -Lâts curt a man çampe- (Foto 5)

(Foto 6) Lâts curt dret, Macôr e Fortunât decapitâts.

(Foto 7) Po, sul lâts lunc, si viôt la deposizion intal sepulcri dai cuarps decapitâts e dai cjâfs dai Sants, tignûts intun vêl de matrone Alessandrie che Macôr i veve tornât la viste; si ricognossin Gregori cul fi e Ponzian, il vuardian, a man drete.

Sui cjantons de casse a son curnîs cun buscj dai simbui dai cuatri evangjeliscj. (Foto 8)

Inte curnîs adalt, i buscj di apuestui, sants e profetis (si ricognossin Pieri e Pauli, il Batiste e i profetis Denêl, Davide e cun dute probabilitât Ezechiêl e Jeremie). (Foto 9)

Il sarcofac, di là dal cuarp dal Patriarcje Bertrant, al veve dentri i siei cimelis che a son intes vetrinis des salis 2 e 3.
Il furniment funerari al è componût di paraments liturgjics dai timps di Bertrant: il cjamesot di tele di lin cu la bandiere di sede cu la acuile in cjamp turchin, simbul dal Patriarcjât; la strete di diaspri e lampàs cuntune lavorazion di origjin persiane; la planete di vilût cremis e decorazions une vore finis, ricamadis cun sede, aur e arint che a figurin musis di sants, la Vergjine e Jesù; il manipul; il façolet ricamât; l’amit tiessût cun motîfs sacris simbolics; il cussin ricamât inte aree furlane tant che il grant goton funerari di tele di lin ricamade di lin a partiduris gjeometrichis cuntun unic motîf a crôs. A insiorin il repertori storic artistic i aurs sacris e profans dal secul XIV al XVII leâts pal plui ae devozion e al cult daspò de muart cruente dal Beât Bertrant. Tra chei, e risalte il pontepet a crôs di Sante Elisabete di Ongjarie, donade dal imperadôr Carli IV di Lussemburc.

Intai mûrs dal Batisteri a son fissâts i afrescs distacâts de Capele Maiôr dal Domo slargjade par volê dal Patriarcje, comissionâts intal 1348 al pitôr Vitâl di Bologne, artist clamât a Udin dal Patriarcje Bertrant. Cun chestis oparis, al à rinovât la piture furlane e chê des regjons dongje, in Carintie e in Slovenie, cuntune influence che e je durade par dute la seconde metât dal secul XIV, fin sul principi dal secul XV.
I afrescs a son stâts distacâts dal côr dal Domo, a rivuardin senis de Biblie e dal Vanzeli.
Cun di plui intai mûrs dal Batisteri a son presints ancjemò i rescj di afrescs che a testemonein cemût che, tra la fin dal secul XIV e il XVII, a fossin plui decorazions pitorichis.