Furlan
Catedrâl
Catedrâl
La Catedrâl di Udin, dedicade a Sante Marie Anunziade, e mostre ancjemò i segns des sôs origjins medievâls in oparis di art e manufats. La prime costruzion dal Domo e va indaûr al secul XIII cuant la glesie e jere intitulade a Sant Durì. La impostazion architetoniche dal difûr e fâs riferiment ancje aes modifichis fatis intal didentri, massime cul Sietcent. La jentrade principâl e je insuazade dal portâl de Redenzion (secul XIV), e conserve une schirie di elements scultoris tant che la Acuile patriarcjâl e la steme di Udin intune rapresentazion figurade complesse. De bande Nord, l’elegant portâl de Incoronazion de Vergjine (1395-1396) cun tancj Sants apuestui, episodis de vite di Jesù e de Vergjine.
Par dentri la Catedrâl e à un aspiet baroc sflandorôs. Al risalte il presbiteri senografic cu lis sentis di len e il biel altâr maiôr di Giuseppe Torretti (1718). Inte capele dal Santissim Sacrament, i afrescs luminôs di Giovan Battista Tiepolo (1726), fats dome in dîs dîs, e la pale dal Resurît là che lûs divine e lûs atmosferiche si metin adun intune interpretazion universâl e cence timp. Simpri di Tiepolo a son ancje lis pituris dai altârs dai Sants Patrons e de Santissime Trinitât. Intes capelis laterâls de navade a Sud, a son oparis di artiscj furlans dal secul XVI e XVIII: Zuan di Martin, Pelegrin di Sant Denêl, Pomponi Amalteu.
I doi orghins monumentâi realizâts di Pietro Nachini (secul XVIII) a son parsore des jentradis laterâls a Sud e a Nord.
